Exodus 35

Imithetho yeSabatha

1UMosi wabuthanisa isizwe sonke sako-Israyeli wathi kuso, “Lokhu yikho uJehova alilaye ukuba likwenze: 2Okwezinsuku eziyisithupha lizaqhuba imisebenzi, kodwa usuku lwesikhombisa luzakuba lusuku lwenu olungcwele, iSabatha lokuphumula kuJehova. Loba ngubani ozakwenza umsebenzi ngalolosuku kuzamele abulawe. 3Lingabasi umlilo loba kungaphi elihlala khona ngosuku lweSabatha.”

Izimpahla zeThabanikeli

4Ekhuluma lesizwe sonke sako-Israyeli uMosi wathi, “Lokhu yikho uJehova athe akwenziwe: 5Kulokho elilakho khiphani umnikelo kaJehova. Akuthi wonke ozimiseleyo ukuletha kuJehova umnikelo wegolide, isiliva kanye lethusi, 6intambo eziluhlaza, eziyibubende kanye lezibomvu; lelembu elicolekileyo, uboya bembuzi, 7izikhumba zenqama eziphendulwe ngomphendulo obomvu kanye lezikhumba zezinyamazana zolwandle; izigodo zesihlahla som-akhakhiya;

8amafutha om-oliva awokukhanyisa, iziyoliso zamafutha okugcoba abakhethiweyo lawephunga elimnandi lempepha, 9lamatshe aligugu e-onekisi kanye lamanye njalo amatshe aligugu azathungelwa esambathweni semahlombe kanye lesifubeni.

10“Bonke abazingcitshi phakathi kwenu kumele beze bazokwenza konke lokho uJehova alaye ukuthi kwenziwe: 11ithabanikeli lethente lalo kanye lophahla, ingwegwana, amathala imithando, izinsika lezisekelo, 12ibhokisi lesivumelwano lemijabo yalo kanye lesisibekelo esiyisihlalo somusa lekhetheni lokulisitha;

13itafula lemijabo yalo lezitsha zonke kanye lesinkwa esahlukaniselwe uJehova, 14uluthi lwesibane sokukhanyisa kanye lezitsha zalo, izibane lamafutha okukhanyisa, 15i-alithare lempepha lemijabo yalo, amafutha okugcoba abakhethiweyo kanye lempepha elephunga elimnandi, ikhetheni lomnyango esangweni lokuya kuthabanikeli, 16i-alithare leminikelo yokutshiswa leminxibo yokosa eyenziwe ngethusi, imijabo kanye lezitsha zalo zonke, inditshi yethusi kanye lokokuyimisa,

17amakhetheni eguma kanye lezinsika zalo lezisekelo, njalo lekhetheni elesango leguma,

18izikhonkwane zethente lethabanikeli kanye lezeguma, lamagoda azo, 19izambatho ezelukiweyo ezisetshenziswa ekuphatheni umsebenzi endaweni engcwele – zonke izambatho ezingcwele zika-Aroni umphristi kanye lezambatho zamadodana akhe abazisebenzisayo emsebenzini wobuphristi.”

20Ngemva kwalokho isizwe sonke sako-Israyeli sasuka phambi kukaMosi, 21kwathi wonke umuntu owayezimisele lolenhliziyo enikayo waletha umnikelo kuJehova ukuze usetshenziswe eThenteni lokuHlanganela lakuzo zonke izinkonzo zalo, kanye lakuzambatho ezingcwele.

22Bonke ababezimisele, abesilisa labesifazane ngokufanayo, baletha izinto zokucecisa ezemihlobo ngemihlobo ezenziwe ngegolide: izipenede, amacici, indandatho kanye lazo zonke izinto zokucecisa. Bonke baletha igolide labo kwaba ngumnikelo wokuzunguzwa phambi kukaJehova. 23Wonke umuntu owayelentambo eluhlaza, eyibubende, ezibomvu kumbe ilembu elicolekileyo, kumbe uboya bembuzi, izikhumba zenqama eziphendulwe ngomphendulo obomvu loba izikhumba zenyamazana zolwandle wakuletha. 24Labo ababeleminikelo yesiliva kumbe eyethusi bakuletha njengomnikelo kuJehova, kanti laye wonke umuntu owayelezigodo zesihlahla som-akhakhiya ezazingasetshenziswa kuloba yiwuphi umsebenzi, waziletha. 25Wonke owesifazana olobuciko bokweluka waletha ayekweluke ngezandla zakhe – intambo eziluhlaza, eziyibubende lezibomvu kumbe ilembu elicolekileyo.

26Kanjalo bonke abesifazana ababezimisele futhi belobuciko beluka ngoboya bembuzi.

27Abakhokheli baletha amatshe aligugu aweonekisi kanye lamanye njalo amatshe aligugu ukuthi athungelwe esambathweni semahlombe kanye lasesifubeni. 28Baletha njalo leziyoliso kanye lamafutha om-oliva awokukhanyisa lawokugcoba abakhethiweyo kanye lempepha elephunga elimnandi. 29Bonke abako-Israyeli abesilisa labesifazana ababezimisele baletha iminikelo ngokukhululeka kuJehova ukuze kwenziwe yonke imisebenzi uJehova ayelaye uMosi ukuthi bayenze.

Ukukhethwa kukaBhezaleli lo-Oholiyabhi

30Ngalokho uMosi wathi kwabako-Israyeli, “Khangelani, uJehova usekhethe uBhezaleli indodaka ka-Uri, indodana kaHuri, owesizwe sikaJuda, 31njalo usemgcwalise ngoMoya kaNkulunkulu, ngobuciko, ukuqedisisa kanye lolwazi ekwenzeni yonke imisebenzi yobungcitshi 32ukuba adwebe ngobungcitshi isimo sezinto ezizabazwa ngegolide, ngesiliva kanye lethusi, 33ukubaza lokumisa amatshe, ukubaza izigodo njalo enze yonke imisebenzi yomuntu oleminwe lobungcitshi. 34Njalo usenike uBhezaleli kanye lo-Oholiyabhi indodana ka-Ahisamakhi, owesizwe sikaDani ulwazi ekufundiseni abanye. 35UJehova usebagcwalise ngobuciko bokwenza yonke imihlobo yemisebenzi njengezingcitshi, abadwebi kumbe ababumbi bezinto ezingathungwa kumbe ezingabazwa, abathungi beziceciso zentambo eziluhlaza, eziyibubende lezibomvu kanye lamalembu acolekileyo, labaluki – bonke bezingcitshi ezilolwazi olukhulu lababumbi bezinto ezingathungwa kumbe ezingabazwa.